ବଢୁଛି ଲାଲବାହିନୀଙ୍କ ଉପଦ୍ରପ । ରେଳଧାରଣା ଉପରେ ବୋମ ବିସ୍ଫୋରଣ କରି ଟ୍ରେନ୍ ଲାଇନ୍ ଉଡାଇଦେଲେ ମାଓବାଦୀ । ଯାହାକୁ ନେଇ ଏବେ ଓଡ଼ିଶା, ବିହାର, ଝାଡଖଣ୍ଡ, ଦିଲ୍ଲୀ ମଧ୍ୟରେ ଚଳାଚଳ କରୁଥିବା ଟ୍ରେନ୍ ବାଧାପ୍ରାପ୍ତ ହୋଇଛି ।
ସୂଚନା ଅନୁସାରେ ମାଓବାଦୀ ମାନେ ଗତକାଲି ବିଳମ୍ବିତ ରାତିରେ ଦିଲ୍ଲୀ-ହାୱଡା ରୁଟ୍ ରେ ଥିବା ଏକ ରେଳ ଧାରଣାକୁ ବୋମା ବିସ୍ଫୋରଣ କରି ନଷ୍ଟ କରିଦେଇଥିବା ଜଣାପଡିଛି ।
ରେଳଧାରଣା ନଷ୍ଟ ହେବା ପରେ ଏହି ରୁଟ୍ରେ ଚଳାଚଳ କରୁଥିବା ଅନେକ ଟ୍ରେନ୍ ରୁଟ୍ ପରିବର୍ତ୍ତନ କରିଥିବା ବେଳେ ଆଉ କିଛି ଟ୍ରେନ୍ ଅଟଳି ରହିଥିବା ରେଳ ବିଭାଗ ପକ୍ଷରୁ ସୂଚନା ଦିଆଯାଇଛି ।
ବର୍ତ୍ତମାନ ଟ୍ରେନ୍ ନମ୍ବର ୨୨୮୨୪ ନୂଆଦିଲ୍ଲୀ-ଭୁବନେଶ୍ୱର ରାଜଧାନୀ ଏକ୍ସପ୍ରେସ, ୧୨୩୧୪ ନୂଆଦିଲ୍ଲୀ-ସିଆଲଦା ରାଜଧାନୀ ଏକ୍ସପ୍ରେସ ଏବଂ ୧୨୩୦୨ ନୂଆଦିଲ୍ଲୀ-ହାୱଡା ରାଜଧାନୀ ଏକ୍ସପ୍ରେସର ଗତିପଥ ବଦଳିଛି ।
ଏହି ସବୁ ଟ୍ରେନ୍ ଡିଡିୟୁ-ଗୟା-ପ୍ରଧାନଖଣ୍ଟା ପରିବର୍ତ୍ତେ ଡିଡିୟୁ-ପାଟନା-ଝାଝା ମାଧ୍ୟମରେ ଚଳାଚଳ କରିବ ବୋଲି ଜଣାପଡିଛି ।
ସେହିଭଳି ବିହାର-ପୁରୀ ଏକ୍ସପ୍ରେସର ମଧ୍ୟ ରୁଟ୍ ବଦଳିଥିବା ଜଣାପଡ଼ିଛି । ୧୨୮୧୬ ଆନନ୍ଦ ବିହାର-ପୁରୀ ଏକ୍ସପ୍ରେସକୁ କୋଡେର୍ମା-ନେସୁଚବୋ ଗୋମୋ ପରିବର୍ତ୍ତେ ହଜାରିବାଗ ଟାଉନ-ବରକାକାନା ଦେଇ ଚଳାଚଳ କରିବ ।
