ଯଦି ଆପଣମାନେ ସାଧାରଣତଃ ଟ୍ରେନ୍ରେ ଯାତ୍ରା କରୁଛନ୍ତି ଏବଂ ଏଥି ପାଇଁ ଅନ୍ଲାଇନ୍ ଟିକେଟ୍ ବୁକିଂ କରୁଛନ୍ତି, ତା’ହେଲେ ଏହି ଖବର ଆପଣଙ୍କ ପାଇଁ ଗୁରୁତ୍ୱପୂର୍ଣ୍ଣ । ଆଇଆରସିଟିସି ଆପ୍ ଓ ୱେବ୍ସାଇଟ୍ ମାଧ୍ୟମରେ ଟିକେଟ ବୁକିଂର ନିୟମରେ ପରିବର୍ତ୍ତନ କରିଛି । ନୂଆ ନିୟମ ଅନୁସାରେ ଆପଣଙ୍କୁ ଟିକେଟ ବୁକିଂ ପାଇଁ ନିଜର ଆକାଉଣ୍ଟ ଭେରିଫିକେଶନ କରିବାକୁ ପଡ଼ିବ ।
ଭାରତୀୟ ରେଳବାଇର କଂପାନୀ ଆଇଆରସିଟିସିର ନିୟମ ଅନୁସାରେ ଏବେ ଗ୍ରାହକଙ୍କୁ ଟିକେଟ ବୁକିଂ କରିବା ପୂର୍ବରୁ ମୋବାଇଲ ନମ୍ବର ଓ ଇ-ମେଲ ଆଇଡିକୁ ଭେରିଫିକେଶନ କରିବାକୁ ହେବ । ଏହି ଦୁଇ କାମ ବିନା ଟିକେଟ ବୁକିଂ କରିପାରିବେ ନାହିଁ । ଅସଲକଥା ହେଲା ଯେ, ଆଇଆରସିଟିସିର ଅନେକଗୁଡ଼ିଏ ଗ୍ରାହକ ଅଛନ୍ତି, ଯେଉଁମାନେ କି କରୋନା ମହାମାରୀ ଆରମ୍ଭ ହେବା ପରଠାରୁ ଏପର୍ଯ୍ୟନ୍ତ ଅନଲାଇନ୍ ଟିକେଟ ବୁକିଂ କରିନାହାନ୍ତି । ଯଦି ଆପଣ ମଧ୍ୟ ଦୀର୍ଘ ଦିନ ହେବ ଟିକେଟ ବୁକିଂ କରିନାହାନ୍ତି, ତାହେଲେ ଏହି ନିୟମ ଆପଣଙ୍କ ପାଇଁ ମଧ୍ୟ ପ୍ରଯୁଜ୍ୟ ହେବ । ଟିକେଟ ବୁକିଂ କରିବା ପୂର୍ବରୁ ମୋବାଇଲ ନମ୍ବର ଓ ଇ-ମେଲ ଆଇଡି ଭେରିଫିକେଶନ କରିବାକୁ ପଡ଼ିବ ।
ରେଳବାଇ ନିଜର ଯାତ୍ରୀଙ୍କ ପାଇଁ ଆଉ ଏକ ବଡ଼ ଖବର ଆଣିଛି । ଆଇଆରସିଟିସିର ଜଣେ ଗ୍ରାହକ ପୂର୍ବରୁ ନିଜ ଆଇଡିରେ ମାସକୁ ସର୍ବାଧିକ ୧୨ଟି ଟିକେଟ ବୁକ୍ କରିପାରୁଥିଲେ । ଏବେ ଏହି ସଂଖ୍ୟା ୨୪କୁ ବୃଦ୍ଧି କରାଯାଇଛି । କିନ୍ତୁ ଏଥିପାଇଁ ଗ୍ରାହକଙ୍କ ଆଧାରକାର୍ଡ ନମ୍ବର ଆଇଆରସିଟିସି ଆକାଉଣ୍ଟ ସହିତ ସଂଯୋଗ ହୋଇଥିବା ଦରକାର ।
