କେନ୍ଦ୍ରାପଡା :-(ରିପୋର୍ଟ -ଜନ୍ମେଜୟ ବିଶ୍ୱାଳ)ହୁସିଆର ! ମାତିଛନ୍ତି ବାଇକ୍ ଲୁଟେରା !!! ପେନ୍ଥାଏ ବାଇକ ଲକ୍ ଚାବି ଧରି ରାସ୍ତାକଡରେ ରଖାଯାଇଥିବା ବାଇକ୍ ମାନଙ୍କର ତାଲାରେ ଚାବି ପୁରାଇ ଖୋଲିବାକୁ ଚେଷ୍ଟା କରୁଥିଲା ଏ ଯୁବକ । ଲୋକେ ବାଇକ୍ ଚୋର କହି ମାଡିବସି ପୋଲିସକୁ ଜିମାଦେଲେ ।
ସୁଚନା ଅନୁସାରେ ଆଜି କେନ୍ଦ୍ରାପଡା ସହରର ନୂଆ ମଟରଷ୍ଟାଣ୍ଡ ନିକଟ ଅନ୍ନପୂର୍ଣ୍ଣା ଛକରେ ଏକ ସନ୍ଦିଗ୍ଧ ବାଇକ୍ ଲୁଟେରାକୁ ଧରିଛନ୍ତି ସ୍ଥାନୀୟ ଲୋକମାନେ । ଯୁବକ ଜଣକ ସନ୍ତର୍ପଣରେ ହାତରେ ପେନ୍ଥାଏ ବାଇକ୍ ଲକ୍ ଚାବିଧରି ରାସ୍ତା କଡରେ ବାଇକ୍ ରଖି ଦୋକାନ ମାନଙ୍କରେ କିଣାକିଣି କରୁଥିବା ଗରାଖ ମାନଙ୍କ ବାଇକ୍ ଲକ୍ ରେ ଭର୍ତ୍ତିକରି ଖୋଲିବାକୁ ଚେଷ୍ଟା କରୁଥିଲା । ଏହି ଅବସ୍ଥାରେ ଜଣେ ବ୍ୟବସାୟୀଙ୍କ ନଜରରେ ପଡିଯାଇଥିଲା ଚୋର ଜଣକ ।
ତତ୍କ୍ଷଣାତ ବ୍ୟବସାୟୀ ଜଣକ ଏହି ଯୁବକକୁ କାବୁ କରି ହଲ୍ଲା କରିଦେବାରୁ ସ୍ଥାନୀୟ ଲୋକେ ମେଳିହୋଇ ଯୁବକ ଜଣକୁ ମାଡିବସି ନିକଟରେ ଥିବା ଇଲେକ୍ଟ୍ରି ଖୁଣ୍ଟରେ ଖରାରେ ବାନ୍ଧିପକାଇ ଉତ୍ତମ ମଧ୍ୟମ ଦେଇଥିଲେ । ଯୁବକ ଜଣକ କେନ୍ଦ୍ରାପଡା ସହରର କ୍ୟୁରେସିମହଲା ଗାଁର ସେକ୍ ରଇମୁଦ୍ଦିନ ବୋଲି ସେ ତାର ପରିଚୟ ଦେଇଛି ।
କୌଣସି ବାଇକ୍ ଚୋରି ହୋଇଥିବାର ଖବର ମିଳିନାହିଁ । ଯୁବକଙ୍କ ସହିତ ଅନ୍ୟ ସହଯୋଗୀ ଲୁଟେରା ମଧ୍ୟ ଛାନିଆରେ ସେଠାରୁ ଖସି ପଳାଇ ଥିବା ଲୋକେ ସଂଦେହ କରୁଛନ୍ତି। କେନ୍ଦ୍ରାପଡା ଟାଉନଥାନା ପୋଲିସ ପହଞ୍ଚି ଏହି ଯୁବକକୁ ଥାନାକୁ ଧରିନେଇ ପଚରାଉଚରା କରୁଛି ।
