ଭାରତୀୟ ସେନାରେ ଗୁପ୍ତଚର ସହିତ ଜଡ଼ିତ ବଡ଼ ଖବର ଗଣମାଧ୍ୟମରୁ ଜଣାପଡ଼ିଛି । ରାଜସ୍ଥାନରେ ମୁତୟନ ସେନାର ଜଣେ ଯବାନ ପାକିସ୍ତାନୀ ମହିଳା ଏଜେଣ୍ଟ ସହ ହନୀଟ୍ରାପ୍ ହୋଇଛି । ଏହା ପରେ ଯବାନଙ୍କ ଠାରୁ ଅନେକଗୁଡ଼ିଏ ଗୋପନୀୟ ତଥ୍ୟ ହାସଲ କରାଯାଇଛି । ବଦଳରେ ଅର୍ଥ ଦିଆଯାଇଥିବା ମଧ୍ୟ ସୂଚନା ମିଳିଛି । ଯବାନଙ୍କୁ ଶାସକୀୟ ଗୁପ୍ତ କଥା ଅଧିନୟମ, ୧୯୨୩ ଆଧାରରେ ମାମଲା ରୁଜୁ କରିବା ସହିତ ଗିରଫ କରାଯାଇଛି ।
ଏହି ମାମଲାରେ ୨୪ ବର୍ଷୀୟ ସେନାର କର୍ମଚାରୀଙ୍କୁ ରାଜସ୍ଥାନ ପୋଲିସର ଗୁଇନ୍ଦା ଶାଖା ଗିରଫ କରିଛି । ତାଙ୍କ ଉପରେ ଗୁପ୍ତଚର ଓ ଗୋପନୀୟ ତଥ୍ୟ ପାକିସ୍ତାନ ଏଜେଣ୍ଟକୁ ଲିକ କରିବା ଅଭିଯୋଗ ରହିଛି । ଧରାପଡ଼ିଥିବା ଯବାନ ହେଲେ ଶାନ୍ତିମୟ ରାଣା । ସେ ପଶ୍ଚିମବଙ୍ଗର ବାଙ୍କୁଡା ଜିଲ୍ଲା ଅନ୍ତର୍ଗତ କାଞ୍ଚନପୁର ନିବାସୀ । ଜୟପୁରରେ ଅର୍ଟଲରୀ ୟୁନିଟରେ ମୁତୟନ ଥିଲେ ।
ରାଜସ୍ଥାନ ପୋଲିସର ଗୁଇନ୍ଦା ଶାଖାର ନିର୍ଦ୍ଦେଶକ ଜେନେରାଲ ଉମେଶ ମିଶ୍ର କହିଛନ୍ତି ଯେ, ପାକିସ୍ତାନୀ ଏଜେଣ୍ଟ ଗୁରନୌର କୌର ଓରଫ ଅଙ୍କିତା ଓ ନିଶା ସାମାଜିକ ଗଣମାଧ୍ୟମ ଜରିଆରେ ଯବାନଙ୍କ ସହିତ ସଂପର୍କ କରିଥିଲେ । ଗୁଇନ୍ଦା ଶାଖା ତରଫରୁ କୁହାଯାଇଛି ଯେ, ୨ ମହିଳା ରାଣାଙ୍କ ନମ୍ବର ନେଇଥିଲେ । ଉଭୟ ହ୍ୱାଟ୍ସଆପରେ ମଧ୍ୟ କଥା ହେଉଥିଲେ । ପୂର୍ବରୁ ସେମାନେ ରାଣାକୁ ଭରସା ଦେଇଥିଲେ । ଏହା ପରେ ଗୁଇନ୍ଦା ତଥ୍ୟ ହାସଲ କରିବାରେ ଲାଗିଲେ । ବଦଳରେ ରାଣାଙ୍କ ଖାତାକୁ ଅର୍ଥ ମଧ୍ୟ ପଠାଉଥିଲେ ।
ରାଣା କହିଛନ୍ତି ଯେ, ସେ ୨୦୧୮ ମସିହାରେ ଭାରତୀୟ ସେନାରେ ଯୋଗ ଦେଇଥିଲେ । ବିଗତ କିଛି ଦିନ ହେବ ହ୍ୱାଟସ୍ଆପ ଚାଟ, ଭିଡିିଓ ଓ ଅଡିଓ ମେସେଜ ମାଧ୍ୟମରେ ମହିଳା ପାକିସ୍ତାନୀ ଏଜେଣ୍ଟଙ୍କ ସଂପର୍କରେ ଥିଲେ । ମହିଳା ନିଜକୁ ଶାହଜହାଁପୁର (ଉତ୍ତରପ୍ରଦେଶ) ନିବାସୀ ବୋଲି କହୁଥିଲେ । ମହିଳା କହୁଥିଲେ ଯେ, ସେମାନେ ମିଲିଟାରୀ ଇଞ୍ଜିନିୟରିଂରେ କାମ କରନ୍ତୁ । ଦ୍ୱିତୀୟ ମହିଳା ନିଜକୁ ନିଶା ବୋଲି ପରିଚୟ ଦେଇଥିଲେ । ସେ ମିଲିଟାରୀ ନର୍ସିଂ ସର୍ଭିସ କାମ କରନ୍ତି ବୋଲି କହିଥିଲେ । ଏହି ମହିଳା ଜଣକ ରାଣାଙ୍କୁ ଗୋପନୀୟ କାଗଜ, ଫୋଟୋଗ୍ରାଫ, ଯୁଦ୍ଧାଭ୍ୟାସର ଭିଡିଓ ମାଗିଥିଲେ । ରାଣା ମଧ୍ୟ ନିଜର ରେଜିମେର୍ଟର ଗୋପନୀୟ ତଥ୍ୟ ସେୟାର କରିଥିଲେ ।
